اسلام آباد(آئی پی ایس )سپریم کورٹ نے چیف الیکشن کمشنر سکندر سلطان راجہ کی تعیناتی کیخلاف اپیل مسترد کردی،قائمقام چیف جسٹس کی سربراہی میں دو رکنی بینچ نے سماعت کی۔قائمقام چیف جسٹس نے استفسار کیا کہ کیا الیکشن کمیشن میں اس وقت کوئی حاضر سروس جج ہے۔ جس پر درخواست گزار علی عظیم آفریدی نے کہا کہ اس وقت کوئی حاضر سروس جج الیکشن کمیشن میں نہیں۔ قائمقام چیف جسٹس عمر عطا بندیال نے کہا کہ پھر تو بات ہی ختم ہوجاتی ہے۔قائمقام چیف جسٹس نے کہا کہ آپ کہتے ہیں ریٹائرڈ بیوروکریٹ کو چیف الیکشن کمشنر نہیں لگایا جا سکتا، آپ نے کہا ہے چیف الیکشن کمشنر کی تعیناتی کیلئے چیف جسٹس سے مشاورت ہونی چاہیے، کیا آپ نے چیئرمین نیب تعیناتی کیس کا فیصلہ پڑا ہے۔ قائمقام چیف جسٹس نے ریمارکس دیے کہ چیف الیکشن کمشنر اور چیئرمین نیب جوڈیشل افسران نہیں ہوتے، درخواست میں آپ نے آئینی ترمیم کو بھی چیلنج کیا ہے، آئین کے مطابق کسی آئینی ترمیم کو چیلنج نہیں کیا جاسکتا، آپ کی کوشش کو سہراتے ہیں آپ نے آئینی نقطہ اٹھایا، عدالت نے رجسٹرار آفس کے اعتراضات برقرار رکھتے ہوئے عظیم آفریدی کی اپیل بمعہ آئینی درخواست خارج کر دی۔
