کراچی (آئی پی ایس )آرمی چیف جنرل قمر جاوید باجوہ نے دورہ کراچی کے موقع پر ملیحہ سے بھی ملاقات کی جوکہ اب اسی اسکول میں طالبات کو شطرنج سکھاتی ہیں۔ آرمی چیف کے ساتھ شطرنج کھیلنے والی طالبہ اب خود اپنے اسکول میں شطرنج کی ٹیچر کی ذمہ داریاں نبھارہی ہیں۔ میڈیا رپورٹس کے مطابق 2018 میں آرمی چیف جنرل قمر جاوید باجوہ نے غیر سرکاری تنظیم زندگی ٹرسٹ کے تحت چلنے والے مختلف سرکاری اسکولوں کے طلبا وطالبات سے جنرل ہیڈ کوارٹرز (جی ایچ کیو) راولپنڈی میں ملاقات کی تھی۔اور اس دوران ایک لڑکی کے ساتھ شطرنج بھی کھیلی تھی۔ خیال رہے کہ جنرل قمر جاوید باجوہ نے اپنے دورہ کراچی کے دوران زندگی ٹرسٹ کے تحت چلنے والے اسکول کا بھی دورہ کیا۔ملیحہ اب اپنے اسکول ایس ایم بی فاطمہ جناح میں ہی ٹیچنگ کررہی ہیں اور طالبات کو شطرنج سکھاتی ہیں ، اس کے ساتھ ہی اپنی تعلیم بھی جاری رکھی ہوئی ہے۔ ملیحہ نے کہا کہ شطرنج بنیادی طور پر ایک جنگی کھیل ہے، آرمی چیف کے ساتھ شطرنج کھیلنا میرے لیے اعزاز کی بات ہے، آرمی چیف کے ساتھ شطرنج کھیل کر میری دلچسپی میں اور اضافہ ہوا اور آرمی چیف نے بھی میرا حوصلہ بڑھایا۔ ملیحہ کا کہنا تھا کہ شطرنج ذہن کا کھیل ہے جو کہ ذہنی صحت کے لیے اہم ہے، اس سے تخلیقی صلاحیتوں میں اضافہ ہوتا ہے، ایسے میں جب نجی اسکول بھی اس کھیل پر توجہ نہیں دیتے، ایک سرکاری سکول میں اس کی کلاسیں ہونا منفرد بات ہے۔
