اسلام آباد،وزیراعظم عمران خان نے صحت کارڈ کی فراہمی کو موجودہ حکومت کا انتہائی اہم اقدام قرار دیتے ہوئے کہا ہے کہ یونیورسل ہیلتھ کوریج موجودہ حکومت کے ویژن کا اہم جزو ہے، اس منصوبہ پر عملدرآمد کو موثر بنانے کیلئے وفاقی اور صوبائی سطح پر خصوصی سیل تشکیل دیا جائے۔ان خیالات کا اظہار انہوں نے جمعہ کو پنجاب میں صحت کارڈ کی فراہمی سے متعلق اجلاس کی صدارت کرتے ہوئے کیا۔
اجلاس میں وزیر اعظم کے معاون خصوصی ڈاکٹر فیصل سلطان اور ڈاکٹر شہباز گل ، وزیر صحت پنجاب ڈاکٹر یاسمین راشد ، وزیر صحت/خزانہ خیبر پختونخوا تیمور سلیم جھگڑا اور دیگر سینئر افسران نے شرکت کی۔وزیراعظم کو بتایا گیا کہ پنجاب کے تمام 36 اضلاع میں تقریبا 4 کروڑصحت کارڈ کی تقسیم کا عمل 31 دسمبر سے شروع کر کے مارچ تک مکمل کر لیا جائے گا، اس سہولت کے بہتر استعمال کو یقینی بنانے کے لئے بڑے پیمانے پر عوامی آگاہی مہم بھی شروع کی جائے گی۔وزیر اعظم نے متعلقہ حکام کو ہدایت کی کہ اس منصوبے کے موثرنفاذ کو یقینی بنانے کے لئے تمام وسائل کو بروئے کار لایا جائے۔ وزیرِ اعظم نے صحت کارڈ کی فراہمی کو موجودہ حکومت کا انتہائی اہم اقدام قرار دیتے ہوئے کہا کہ یونیورسل ہیلتھ کوریج کی فراہمی موجودہ حکومت کے وژن کا اہم جزو ہے۔انہوں نے کہا کہ معاشرے کے کمزور طبقات تک صحت کی معیاری سہولیات نہ صرف ہماری ذمہ داری ہے بلکہ ہماری ترجیحات کا بھی واضح مظہر ہے۔ انہوں نے کہا کہ صحت کارڈاقدام کی بدولت جہاں معاشرے کے کمزور طبقات کو صحت کی معیاری سہولیات میسر آئیں گی وہاں ہسپتالوں کے شعبے خصوصا نجی شعبے کو فروغ حاصل ہوگا۔ وزیرِاعظم نے وزرائے صحت کو ہدایت کی کہ مختلف ہسپتالوں میں صحت کارڈ کے ذریعے جہاں یکساں معیاری سہولیات کو یقینی بنایا جائے وہاں اس امر کو بھی یقینی بنایا جائے کہ ہسپتالوں میں آنے والے افراد خصوصا کم تعلیم یافتہ افراد کی مناسب رہنمائی کی جائے۔صحت کارڈ کے ذریعے معیاری سروس کو یقینی بنانے کے حوالے سے وزیرِ اعظم نے ہدایت کی کہ سہولت سے مستفید ہونے والے افراد کے فیڈ بیک کو نظام کا مستقل حصہ بنایا جائے تاکہ کسی بھی دقت کو بروقت دور کیا جاسکے۔وزیر اعظم نے منصوبے پر عملدرآمد کو موثر بنانے کے لئے وفاقی اور صوبائی سطح پر خصوصی سیل تشکیل دینے کی بھی ہدایت کی۔
