اسلام آباد(آئی پی ایس) ایس سی او رکن ممالک کی وزرائے خارجہ کونسل کے اجلاس میں شرکت کے لیے کرغزستان پہنچنے والے ایرانی وزیرِ خارجہ عباس عراقچی نے اجلاس کے موقع پر پاکستان کے نائب وزیرِ اعظم اور وزیرِ خارجہ اسحاق ڈار سے ملاقات کی۔ دونوں رہنماؤں نے دوطرفہ تعلقات کے ساتھ ساتھ علاقائی اور بین الاقوامی صورتحال پر تبادلۂ خیال کیا۔
عباس عراقچی نے گزشتہ چند ماہ کے دوران پاکستان کی جانب سے کشیدگی کم کرنے اور سفارتی رابطوں کے لیے کی جانے والی کوششوں پر شکریہ ادا کیا۔ انہوں نے کہا کہ امریکہ کی جانب سے وعدوں کی خلاف ورزی اور حد سے زیادہ دباؤ موجودہ علاقائی صورتحال کی بنیادی وجوہات ہیں۔ انہوں نے ایران کے اہم بنیادی ڈھانچے پر امریکی حملوں کی مذمت کرتے ہوئے اس عزم کا اظہار کیا کہ ایران اپنی قومی خودمختاری اور مفادات کا ہر صورت دفاع کرے گا۔
اسحاق ڈار نے اس موقع پر کہا کہ ایران کی قومی خودمختاری اور علاقائی سالمیت کا احترام کیا جانا چاہیے۔ انہوں نے کہا کہ پاکستان کشیدگی میں مزید اضافے کو روکنے کے لیے سفارتی ذرائع کے ذریعے اپنا تعمیری کردار ادا کرنے کے لیے تیار ہے۔
