اسلام آباد۔حکومتِ پاکستان کی جانب سے معروف صنعتکار و سماجی شخصیت میاں محمد کاشف اشفاق کو ان کی انسان دوستی، فلاحی خدمات اور ملکی معیشت میں گرانقدر کردار کے اعتراف میں تمغۂ امتیاز سے نوازنے کا اعلان ایک قابلِ تحسین اور تاریخی لمحہ ہے۔ اس سلسلے میں باوقار تقریب 28 اپریل 2026ء کو ایوانِ صدر میں منعقد ہوگی، جہاں انہیں اس اعلیٰ سول اعزاز سے سرفراز کیا جائے گا۔جاری بیان کے مطابق یہ اعزاز نہ صرف ان کی ذاتی کامیابی کا مظہر ہے بلکہ ملک بھر کے صنعتکاروں، تاجروں اور سماجی کارکنوں کیلئے بھی باعثِ فخر ہے۔میاں محمد کاشف اشفاق کا شمار ان باصلاحیت اور وژنری بزنس لیڈرز میں ہوتا ہے جنہوں نے اپنی انتھک محنت، دیانتداری اور قائدانہ صلاحیتوں کے ذریعے نہ صرف کاروباری دنیا میں نمایاں مقام حاصل کیا بلکہ قومی ترقی میں بھی بھرپور کردار ادا کیا۔ بطور چیئرمین پاکستان فرنیچر کونسل انہوں نے فرنیچر انڈسٹری کو ایک نئی سمت دی۔ ان کی قیادت میں اس شعبے میں جدت، معیار اور برآمدات کے فروغ کیلئے موثر اقدامات کیے گئے، جس سے پاکستان کی مصنوعات کو عالمی منڈیوں میں بہتر مقام حاصل ہوا۔مزید برآں، وہ فیصل آباد انڈسٹریل اسٹیٹ مینجمنٹ اینڈ ڈویلپمنٹ کمپنی (فیڈمک) کے چیئرمین کے طور پر بھی اپنی خدمات انجام دے چکے ہیں۔ اس حیثیت میں انہوں نے صنعتی زونز کی ترقی، سرمایہ کاروں کیلئے سازگار ماحول کی فراہمی اور روزگار کے وسیع مواقع پیدا کرنے میں اہم کردار ادا کیا۔ ان کی پالیسیوں اور اقدامات نے نہ صرف مقامی صنعت کو مضبوط کیا بلکہ ملکی معیشت کو استحکام بخشنے میں بھی مدد دی۔ان کی شخصیت کا ایک اہم اور قابلِ تقلید پہلو ان کی انسان دوستی اور فلاحی سرگرمیاں ہیں۔ میاں کاشف اشفاق ہمیشہ معاشرے کے محروم اور مستحق طبقات کی مدد کیلئے پیش پیش رہے ہیں۔ تعلیم، صحت اور سماجی بہبود کے شعبوں میں ان کی خدمات اس بات کا ثبوت ہیں کہ وہ محض ایک کامیاب کاروباری شخصیت ہی نہیں بلکہ ایک دردِ دل رکھنے والے انسان بھی ہیں۔تمغۂ امتیاز کا حصول دراصل ان کی برسوں پر محیط محنت، لگن اور خدمت کا اعتراف ہے۔ یہ اعزاز اس بات کی گواہی دیتا ہے کہ جو افراد خلوصِ نیت سے ملک و قوم کی خدمت کرتے ہیں، انہیں ایک دن ضرور سراہا جاتا ہے۔ اس موقع پر عوامی، سماجی اور کاروباری حلقوں کی جانب سے انہیں زبردست خراجِ تحسین پیش کیا جا رہا ہے اور ان کیلئے نیک تمناؤں کا اظہار کیا جا رہا ہے۔یہ امر بھی قابلِ ذکر ہے کہ ایسے اعزازات نوجوان نسل کیلئے ایک مثبت پیغام ہوتے ہیں۔ میاں محمد کاشف اشفاق کی زندگی اس بات کی عملی مثال ہے کہ محنت، دیانت اور خدمت کے جذبے کے ساتھ کوئی بھی شخص نہ صرف اپنی ذات کو کامیاب بنا سکتا ہے بلکہ ملک و قوم کی ترقی میں بھی نمایاں کردار ادا کر سکتا ہے۔آخر میں دعا ہے کہ اللہ تعالیٰ میاں محمد کاشف اشفاق کو مزید کامیابیاں عطا فرمائے، انہیں صحت و تندرستی کے ساتھ ملک و قوم کی خدمت جاری رکھنے کی توفیق دے اور ان کی کاوشوں کو مزید ثمر آور بنائے۔
