ابوظہبی، ہو اے ای بلز نے ابو ظہبی ٹی10 لیگ کے ایلیمینیٹر میں شاندار پاور ہِٹنگ کا مظاہرہ کرتے ہوئے عجمان ٹائٹنز کو 47 رنز سے شکست دے دی۔
فل سالٹ، ٹِم ڈیوڈ اور روومن پاول کی دھواں دار بیٹنگ نے مجموعی طور پر 16 چھکے لگائے اور ٹیم کو رواں سیزن کا سب سے بڑا اسکور 162 دلوایا۔سالٹ اور جیمز ونس نے 68 رنز کی برق رفتار شراکت قائم کی۔ ونس 21 رنز بناکر وسیم اکرم کے ہاتھوں آؤٹ ہوئے، مگر سالٹ اپنی نصف سنچری مکمل کرنے کے بعد بھی حریف بولرز پر حاوی رہے۔ مڈل اوورز میں ٹِم ڈیوڈ نے صرف 13 گیندوں پر 40 رنز بنا کر چار مسلسل چھکے جڑے، جبکہ روومن پاول نے 10 گیندوں پر 32 ناٹ آؤٹ کی دھماکہ خیز اننگز کھیلتے ہوئے تین چھکے اور تین چوکے لگائے۔ بلز نے 162 رنز بنا کر ابو ظہبی کے میدان پر سب سے بڑا مجموعہ برابر کیا۔ ٹائٹنز نے بھی جارحانہ آغاز کیا۔ اینیورِن ڈونلڈ (37 آف 18) اور ایلکس ہیلز (35 آف 18) نے صرف 5 اوورز میں 68 رنز جڑ کر Bulls کو دباؤ میں ڈال دیا۔لیکن پھر اچانک میچ کا نقشہ بدل گیا۔ ٹائٹنز کی بیٹنگ یکدم بکھر گئی اور ٹیم نے 18 رنز کے اندر 4 وکٹیں گنوا دیں۔جُنید صدیقی نے شاندار اسپیل کرتے ہوئے پہلے ایک کفایتی اوور پھینکا، پھر ایک ہی اوور میں ہیلز اور رائیلی روسو کو پویلین کی راہ دکھا دی۔
ڈونلڈ کو محمد روحید خان نے آؤٹ کیا جبکہ کپتان معین علی صرف 8 رنز بنا کر سنیل نارائن کا شکار بنے۔ آخر میں ڈین لارنس (14) اور وِل اسمیڈ (18) کریز پر موجود رہے مگر ٹائٹنز مقررہ اوورز میں 115/4 تک ہی محدود رہے۔یو اے ای بلز نے نہ صرف بھرپور بیٹنگ کی بلکہ سخت بولنگ اور فیلڈنگ کے ساتھ فائنل کی دوڑ میں اپنی امیدیں برقرار رکھیں۔
