بحرین کے ڈیفنس فورس چیف آف اسٹاف کا ایئر ہیڈکوارٹرز کا دورہ، ائیر چیف سے ملاقات

اسلام آباد (آئی پی ایس )بحرین کی ڈیفنس فورس کے چیف آف اسٹاف لیفٹیننٹ جنرل تھیاب صقر عبداللہ النعیمی نے ایئر ہیڈکوارٹرز اسلام آباد کا دورہ کیا جہاں انہوں نے پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔
ملاقات میں باہمی دلچسپی کے امور اور دفاعی تعاون کے فروغ پر تفصیلی تبادلہ خیال کیا گیا جبکہ دونوں سربراہان نے مشترکہ تربیت اور عسکری ترقی کے لیے نئی راہیں تلاش کرنے اور تعاون کو مزید وسعت دینے کے عزم کا اظہار کیا۔لیفٹیننٹ جنرل تھیاب صقر عبداللہ النعیمی کی آمد پر پاک فضائیہ کے چاق و چوبند دستے نے انہیں گارڈ آف آنر پیش کیا۔
ایئر چیف نے معزز مہمان کا پرتپاک استقبال کرتے ہوئے کہا کہ پاکستان اور بحرین کے درمیان مذہبی و تاریخی تعلقات دونوں ممالک کی افواج کے مضبوط رشتے کا مظہر ہیں۔ایئر چیف نے دوطرفہ عسکری تعاون، مشترکہ تربیت اور تکنیکی و علمی اشتراک کو فروغ دینے پر زور دیا۔ انہوں نے کہا کہ پاکستان بحرین کے ساتھ اپنے دفاعی تعلقات کو قدر کی نگاہ سے دیکھتا ہے جو خطے میں امن اور استحکام کے لیے اہم ہیں۔
بحرین کے چیف آف اسٹاف نے پاک فضائیہ کی پیشہ ورانہ مہارت اور خود انحصاری کے سفر کو سراہتے ہوئے ملٹی ڈومین آپریشنز اور جدید تربیت کے حوالے سے تعاون کی خواہش کا اظہار کیا۔انہوں نے بحرینی پائلٹس اور انجینئرز کے لیے مشترکہ تربیتی پروگرامز شروع کرنے میں بھی دلچسپی ظاہر کی۔معزز مہمان نے نیشنل ایرو اسپیس سائنس اینڈ ٹیکنالوجی پارک کے کردار کو سراہا اور بعد ازاں نیشنل آئی ایس آر اینڈ انٹیگریٹڈ ایئر آپریشنز سینٹر اور پی اے ایف سائبر کمانڈ کا دورہ بھی کیا جہاں انہیں پاک فضائیہ کی آپریشنل صلاحیتوں پر بریفنگ دی گئی۔یہ ملاقات دونوں ممالک کے مابین دفاعی تعلقات اور عسکری شراکت داری کو مزید مستحکم بنانے کے عزم کا عکاس ہے۔