بیجنگ : چینی وزارت خارجہ کے ترجمان گو جیاکھون نے یومیہ پریس کانفرنس میں امریکی رکنِ کانگریس کے تائیوان کے غیر قانونی دورے کے حوالے سے کہا کہ چین ہمیشہ سے امریکہ اور تائیوان کے درمیان کسی بھی قسم کے سرکاری تعلقات کی سختی سے مخالفت کرتا ہے۔
امریکی رکنِ کانگریس کا تائیوان کا غیر قانونی دورہ ایک چین کے اصول اور چین-امریکہ تین مشترکہ اعلامیوں کی سنگین خلاف ورزی ہے، جو چین کے اقتدار اعلی اور علاقائی سالمیت کو نقصان پہنچاتا ہے اور تائیوان کے علیحدگی پسند گروہوں کو غلط سگنل فراہم کرتا ہے۔ چین اس پر سخت ناراضگی کا اظہار کرتا ہے۔ چین امریکہ سے مطالبہ کرتا ہے کہ وہ ایک چین کے اصول اور چین-امریکہ تین مشترکہ اعلامیوں پر قائم رہے، کسی بھی بہانے سے چین کے اندرونی معاملات میں مداخلت کرنے، تائیوان کے علیحدگی پسند گروہوں کی حمایت کرنے، امریکہ اور تائیوان کے درمیان سرکاری تعلقات، اور آبنائے تائیوان میں تناؤ پیدا کرنے سے باز رہے۔
