اسلام آباد (سب نیوز)وزیراعظم شہباز شریف نے آبی ذخائر کی تعمیر کی حکمت عملی پر کام شروع کردیا ہے، جس کے لیے جلد اہم اجلاس بلایا جائے گا۔
وزیراعظم آفس سے جاری اعلامیے کے مطابق وزیراعظم شہباز شریف کے حکم پر موسمیاتی تبدیلی کے اثرات سے نمٹنے کے لیے موثر پالیسی بنانے پر کام جاری ہے، اس پالیسی کا ورکنگ پیپر تمام صوبائی حکومتوں سے شیئر کیا جائے گا۔اعلامیے کے مطابق وزیراعظم نے ہنگامی صورتحال سے نکلتے ہی اعلی سطح اجلاس بلانے کا فیصلہ کیا ہے، جس میں چاروں صوبوں کے وزرائیاعلی اورمتعلقہ اداروں کے سربراہان شریک ہوں گے جب کہ وزیراعظم آزاد کشمیر اور وزیراعلی گلگت بلتستان کو بھی مدعو کیا جائے گا۔
اعلامیے میں کہا گیا ہے کہ وزیر اعظم چاروں صوبوں، آزاد کشمیر اور گلگت بلتستان میں آبی ذخائر کی تعمیرکے لیے حکمت عملی بنارہے ہیں۔ وزیراعظم نے کہا ہے کہ آبی ذخائر مشاورت اور تمام صوبوں کی مکمل ہم آہنگی سے بنائے جائیں گے، موسمیاتی تبدیلی ایک حقیقت ہے، اس کی موثر تیاری سے ہی قدرتی آفات کے نقصانات سے بچا جاسکتا ہے۔شہباز شریف نے مزید کہا کہ چاروں صوبوں، آزادکشمیر، جی بی اور وفاق کو مل کر موسمیاتی تبدیلی سے متعلق کام کرنا ہے، سب کو مل کر لوگوں کو موسمیاتی تبدیلی کے مضر اثرات سے بچانا ہے، یہ ایک قومی مسئلہ ہے جس پر سب کو مل کر کام کرنا ہے۔
