فیصل آباد(آئی پی ایس) فیصل آباد کی انسداد دہشتگردی عدالت نے 9 مئی کے 2 مقدمات میں فیصلہ سناتے ہوئے عمر ایوب اور شبلی فراز سمیت 196 ملزمان کو سزائیں سنا دیں۔
انسداد دہشتگردی کی خصوصی عدالت نے 9 مئی کے 2 مقدمات کا فیصلہ سنایا جس میں 168 ملزمان کو 10، 10 سال کی سزائیں سنائیں۔
انسداد دہشت گردی کی خصوصی عدالت نے حساس ادارے پر حملہ کیس میں 185 میں سے 108ملزمان کو سزائیں سنائیں اور دیگر کو بری کر دیا۔
عدالت نے غلام محمد آباد میں درج 9 مئی کے مقدمے میں 67 ملزمان میں سے7 ملزمان کو بری کر دیا جب کہ 60 ملزمان کو سزائیں سنا دی گئیں۔
انسداد دہشتگردی عدالت نے عمر ایوب، شبلی فراز اور زرتاج گل کو 10 سال قید کی سزا سنائی، رکن قومی اسمبلی صاحبزادہ حامد رضا کو بھی 10سال قید کی سزا سنائی گئی ہے جب کہ جنید افضل ساہی کو 3 سال قید کی سزا سنائی گئی ہے جو تمام افراد کی دی گئی سزاؤں میں سب سے کم ہے۔
عدالت نے خیال کاسترو، فواد چوہدری اور شاہ محمود قریشی کے صاحبزادے زین قریشی کو بری کر دیا۔
تیسرے مقدمے میں 28 ملزمان کو سزا ہوئی ، 4 بری ہوئے
بعد ازاں انسداد دہشت گردی کی عدالت نے ایک اور کیس کا فیصلہ سناتے ہوئے 32 میں سے 28 ملزمان کو سزا سنادی اور 4 کو بری کردیا، عدالت نے 28 ملزمان کو 10، 10سال قید سزا سنائی۔
فیصل آباد کے تھانہ سول لائن میں درج مقدمے میں مجموعی طور پر 107 ملزمان نامزد تھے جن میں سے 32 کا ٹرائل ہوا، عدالت نے مقدمے میں نامزد فوادچوہدری، زین قریشی، خیال کاسترو اور عبداللہ دمڑ کو بری کیا۔
چند روز قبل بھی انسداد دہشتگردی عدالت نے پی ٹی آئی کے احمد چٹھہ، احمد خان بھچر، ڈاکٹر یاسمین راشد اور میاں محمود الرشید سمیت دیگر ملزمان کو 9 مئی کیس میں مجرم قرار دیتے ہوئے 10 سال کی سزا سنائی تھی۔
