امریکا کو مطلوب افراد کی فہرست میں نام کے باوجود ایرانی سفیر کو تمام سفارتی مراعات اور استثنیٰ حاصل ہے، پاکستان

اسلام آباد (سب نیوز)پاکستان نے کہا ہے کہ ایرانی سفیر رضا امیرمقدم کو بطورایرانی سفیر تمام سفارتی مراعات اور استثنیٰ حاصل ہے۔
امریکی تحقیقاتی ادارے ایف بی آئی نے پاکستان میں ایرانی سفیر رضا امیرمقدم کو انتہائی مطلوب افراد کی فہرست میں شامل کیا ہے۔اس حوالے سے ترجمان دفتر خارجہ شفقت علی خان نے کہا ہے کہ پاکستان میں ایرانی سفیر کو احترام کی نظر سے دیکھا جاتا ہے اور ایرانی سفیر کا پاک ایران تعلقات کے فروغ میں اہم کردار ہے۔
ترجمان دفتر خارجہ کے مطابق پاکستان میں ایران کے سفیر پاکستان کے پڑوسی ملک کے سفیر ہیں اور بطورایرانی سفیر انہیں تمام سفارتی مراعات اور استثنی حاصل ہے۔
خیال رہے کہ امریکا نے ایرانی سفارتکار رضا امیر مقدم پر امریکی ریٹائرڈ خصوصی ایجنٹ باب لیونسن کے اغوا میں ملوث ہونیکاالزام لگایا ہے، ایرانی سفیر کے علاوہ مزید 2 ایرانی اہلکاروں پر بھی امریکی ریٹائرڈ خصوصی ایجنٹ کے اغوا میں ملوث ہونے کا الزام ہے۔امریکی ریٹائرڈ خصوصی ایجنٹ باب لیونسن کو 2007 میں ایران کے جزیرہ کیش سے اغواکیا گیا تھا۔