ژوب(آئی پی ایس) دہشت گردوں نے کوئٹہ سے پنجاب جانے والی 2 مسافر بسوں سے 9 مسافروں کو شناخت کے بعد اغوا کرکے شہید کردیا۔
تفصیلات کے مطابق جمعرات کی رات بلوچستان ضلع کے ژوب اور لورالائی کی سرحد پر واقع سورڈکئی کے علاقے میں دہشت گردوں نے کوئٹہ سے لاہور جانے والی 2 کوچز میں سوار کم از کم 9 مسافروں کو اغوا کرنے کے بعد قتل کر دیا۔
ژوب کے اسسٹنٹ کمشنر نوید عالم نے بتایا کہ دونوں کوچز سے اغوا کیے گئے 9 افراد کو قتل کر دیا گیا ہے اور ان کی لاشیں برآمد ہو چکی ہیں، ان کا مزید کہنا تھا کہ لاشوں کو راخنی منتقل کیا جا رہا ہے تاکہ انہیں پنجاب میں ان کے آبائی علاقوں کو بھجوایا جا سکے۔
ترجمان بلوچستان حکومت شاہد رند نے بتایا کہ فتنتہ الہندوستان کے دہشت گردوں نے 9 مسافروں کو شناخت کے بعد بسوں سے اتار کر شہید کیا، بےگناہ شہریوں کو بہیمانہ طریقے سے قتل کرنا فتنۃ الہندوستان کی کھلی درندگی ہے۔
انہوں نے کہا کہ واقعے کی اطلاع ملتے ہی سیکیورٹی فورسز نے فوری ردعمل کا مظاہرہ کرتے ہوئے جائے وقوع پر پہنچ کر دہشت گردوں کا تعاقب کیا۔
ترجمان بلوچستان حکومت کے مطابق دہشت گرد رات کی تاریکی میں فرار ہوئے، تعاقب جاری ہے، سیکیورٹی فورسز کا متاثرہ علاقے میں بھرپور سرچ آپریشن جاری ہے۔
ان کا کہنا تھا کہ یہ پاکستان کے امن اور یکجہتی پرحملہ ہے، دشمن کی چال ناکام بنائیں گے، بلوچستان کے عوام دشمن کے ناپاک عزائم کے سامنے سیسہ پلائی دیوار ہیں، ریاست دشمن عناصر کو عبرتناک انجام تک پہنچایا جائے گا۔
ذرائع کے مطابق پنجاب جانے والی 2 مسافر کوچز کو سورڈکئی کے علاقے میں این-70 ہائی وے کے قریب ڈب کے مقام پر روکا گیا۔
مسلح افراد کوچز میں سوار ہوئے، مسافروں کے شناختی کارڈ چیک کیے اور 10 افراد کو زبردستی گاڑیوں سے اتار لیا۔
ایک زندہ بچ جانے والے مسافر نے لیویز کو بتایا کہ ’انہوں نے ایک کوچ سے 7 افراد اور دوسری کوچ سے 3 افراد کو نکالا اور نامعلوم مقام پر لے گئے، مجھے نہیں معلوم انہوں نے ان کے ساتھ کیا کیا، لیکن ہم جیسے ہی وہاں سے نکلے، میں نے گولیاں چلنے کی آواز سنی‘۔
دہشت گردوں نے 9 مسافروں کو اغوا کرنے کے بعد دونوں کوچز کو وہاں سے جانے کی اجازت دے دی۔
سیکیورٹی فورسز نے شاہراہ پر ٹریفک معطل کر دی اور حملہ آوروں کی تلاش کے لیے بڑے پیمانے پر سرچ آپریشن شروع کر دیا۔
ذرائع کے مطابق حملہ آوروں نے تمام مسافروں کے قومی شناختی کارڈز چیک کیے اور خاص طور پر ان افراد کو نشانہ بنایا جن کا تعلق پنجاب سے تھا، انہوں نے اغوا کے دوران کوچز پر فائرنگ بھی کی تاکہ کوئی مسافر فرار نہ ہو سکے۔
ایک سینئر پولیس افسر نے ڈان کو بتایا کہ ’مسلح افراد کے ہاتھوں اغوا ہونے والے 9 مسافروں کے قتل کی اطلاعات موصول ہوئی ہیں‘۔
بعد ازاں کالعدم تنظیم بلوچستان لبریشن فرنٹ نے اس حملے کی ذمہ داری قبول کر لی، تنظیم کے ترجمان نے کہا کہ انہوں نے موسیٰ خیل-مکھتر اور خجوری کے درمیان شاہراہ کو بند کرنے کے بعد ان 9 افراد کو قتل کیا۔
