غلط بیانی پر وزیراعظم کو نا اہل کیا جاسکتا ہے تو ایوان میں ہنگامہ کرنے والوں کو کیوں نہیں؟، ملک احمد

لاہور:پجاب اسمبلی میں 26 ارکان سمبلی کی نااہلی کا ریفرنس دائر کرنے پر اسپیکر پنجاب اسمبلی ملک احمد خان نے کہا ہے کہ غلط بیانی پر وزیراعظم کو نا اہل کیا جاسکتا ہے تو ایوان میں ہنگامہ کرنے والوں کو کیوں نہیں؟ آرٹیکل باسٹھ تریسٹھ کا مخالف ہوں۔

تفصیلات کے مطابق اسپیکر پنجاب اسمبلی نے لاہور میں پریس کانفرنس کرتے ہوئے کہا کہ نواز شریف کی نااہلی پر پاکستان تحریک انصاف (پی ٹی آئی) نے اسپیکر کےاختیار کی حمایت کی، اسمبلی کی کارروائی میں رکاوٹ ڈالنا بھی حلف کی خلاف ورزی ہے۔
انہوں نے کہا کہ پامانہ کیس فیصلے میں آصف سعید کھوسہ نے کہا کہ وزیراعظم کے خلاف اپوزیشن کے 22 ارکان اسپیکر کے پاس گئے تھے، آرٹیکل 63،62 جمہوریت کیخلاف استعمال ہوئے، آرٹیکل 62، 63 آمریت کی نشانیاں ہیں، چاہیں تو دونوں آرٹیکلز آئین سے نکال پھینکیں۔
انہوں نے کہا کہ آئین کے آرٹیکل 62، 63 کا مخالف ہوں، اسمبلی کو قواعد کے مطابق چلانا اسپیکر کی ذمہ داری ہے، بطور اسپیکر اپنا کردار پوری دیانت داری سے نبھانے کی کوشش کرتا ہوں، ہنگامی آرائی پر کچھ ارکان کو معطل کیا، کچھ کو نوٹسز بھجوائے، ایوان کے تقدس کا خیال رکھنا ہر رکن کی ذمہ داری ہے۔
یاد رہے کہ بجٹ سیشن کے دوران پنجاب اسمبلی میں وزیراعلیٰ مریم نواز کی تقریر کے دوران اپوزیشن ارکان نے ہنگامہ آارائی اور احتجاج کیا تھا، اس دوران اسمبلی میں مبینہ طور پر توڑ پھوڑ بھی کی گئی تھی۔
اس کے بعد اسپیکر پنجاب اسمبلی نے اپوزیشن کے 26 ارکان کی نا اہلی کا ریفرنس الیکشن کمیشن آف پاکستان میں دائر کرنے کا اعلان کیا تھا، ساتھ ہی مختلف ارکان پر لاکھوں روپے جرمانہ بھی عائد کیا گیا تھا۔