تہران میں ایران کے ریڈیو اور ٹیلی ویژن اسٹیشن کی عمارت پر اسرائیل نے حملہ کیا، جس کے نتیجے میں ایران کے سرکاری ٹی وی اسٹیشن کا ایک ملازم جاں بحق اور متعدد زخمی ہوگئے۔ 17 جون کو چائینیز جرنلسٹ ایسو سی ایشن نے ایرانی سرکاری ٹی وی اسٹیشن پر حملے کےحوالے سے جاری ایک بیان میں کہا ہے کہ ایران کے سرکاری ٹیلی ویژن پر حملہ خبر رساں اداروں کے خلاف حملہ تھا۔ خبر رساں اداروں کو بمباری کا نشانہ بنا کر حملہ آوروں نے تہذیب کی حد عبور کی ہے ۔ بیان میں کہا گیا کہ یہ حملہ نہ صرف عمارتوں کو تباہ اور صحافیوں کی زندگیوں کو خطرے میں ڈالتا ہے بلکہ عالمی میڈیا کے تحفظ اور ساکھ کو بھی پامال کرتا ہے۔ بیان میں کہا گیا کہ چینی صحافیوں کی ایسوسی ایشن مطالبہ کرتی ہے کہ سچائی کو چھپانے اور اسے ختم کرنے کی کوشش کو بند کیا جائے اور تنازع والے علاقوں میں صحافیوں کی فوری طور پر حفاظت کی جائے۔
