کوئٹہ:دہشتگرد تنظیم بی ایل اے کا تربت میں معصوم شہریوں پر حملہ،سکیورٹی ذرائع کے مطابق 4 جنوری 2025 کو کالعدم بی ایل اے نے تربت میں ایک مسافر بس پر حملہ کیا۔
جان لیوا حملے میں چار معصوم شہری جاں بحق اور متعدد زخمی ہو گئے- اس دہشتگرد حملے میں شہید ہونے والے افرادنور خان ولد دوشمبے ساکن دشت، ضلع کیچ،-عبدالوہاب ولد عظیم ساکن گوادر،اعجاز ولد زر محمد ساکن گشکور ،آواران ،لیاقت علی ولد الہندا خان ساکن ضلع صحبت پور ہیں ۔
اس حملے کی ذمہ داری بھی بی ایل اے نے قبول کرلی ہے۔
سکیورٹی ذرائع کے مطابق اس حملے سے یہ ثابت ہوتا ہے کہ دہشتگرد تنظیم بی ایل اے اپنے مذموم مقاصد کیلئے معصوم شہریوں کو نشانہ بناتی ہے۔ایک جانب بی ایل اے خود کو بلوچ عوام کے حقوق کا علمبردار قرار دیتی ہے دوسری جانب ان معصوم بلوچوں کی جان کی بھی دشمن ہے۔
یہ حملہ بھی بی ایل اے کی منافقت کا کھلا ثبوت ہے اور ثابت کرتا ہے کہ ان کی تربیت ہی معصوم لوگوں کی جان لینا ہے۔
بی ایل اے کی بلوچ عوام کیخلاف نفرت کا اندازہ اس بات سے لگایا جاسکتا ہے کہ اس نے ایک سال میں 100 سے زائد معصوم بلوچ شہریوں کوشہید کیا-
سکیورٹی ذرائع کے مطابق گزشتہ سال 9 نومبر کو بھی ایک خود کش حملے میں بی ایل اے نے 10 سے زائد معصوم بلوچ شہریوں کی جان لی-
بی ایل اے عوام دشمنی کا ثبوت دیتے ہوئے اپنے ہی لوگوں کے خلاف بیرونی قوتوں کے ایجنڈے پر عمل کرتے ہوئے ان کی زندگیوں سے کھیل رہی ہے۔
