عمران خان، بشری بی بی کیخلاف توشہ خانہ ٹو کیس: وکیل صفائی کی عدم دستیابی کے باعث جرح مکمل نہ ہو سکی

راولپنڈی(آئی پی ایس)چیئرمین پی ٹی آئی عمران خان اور بشری بی بی کے خلاف توشہ خانہ ٹو کیس میں وکیل صفائی کی عدم دستیابی کے باعث استغاثہ کے گواہ پر جرح مکمل نہ ہو سکی۔
تفصیلات کے مطابق بانی پی ٹی ائی عمران خان اور سابق خاتون اول بشری بی بی کے خلاف توشہ خانہ ٹو کیس کی اڈیال جیل میں سماعت ہوئی، بشری بی بی کے وکیل ارشد تبریز بیماری کے باعث عدالت پیش نہ ہو سکے۔
وکیل صفائی کی عدم دستیابی کے باعث استغاثہ کے گواہ بنیامین پر جرح مکمل نہ ہو سکی، اسپیشل پبلک پراسیکیوٹر ذوالفقار عباس نقوی نے بانی پی ٹی آئی کے وکیل قوسین مفتی کو گواہ پر جرح کرنے کی استدعا کی۔
بانی پی ٹی ائی کے وکیل نے مؤقف اپنایا کہ پہلے بشری بی بی کے وکیل گواہ پر جرح مکمل کریں پھر ہم کریں گے۔
عدالت نے وکلا کو ائندہ سماعت پر جرح مکمل کرنے کی ہدایت کی اور سماعت پیر 6 جنوری تک ملتوی کر دی۔
ائندہ سماعت پر جرح کا عمل مکمل نہ کیا گیا تو تادیبی کاروائی عمل میں لائی جائے گی،عدالت
کیس کی سماعت سپیشل جج سینٹرل شاہ رخ ارجمند نے اڈیالہ جیل میں کی۔