اسلام آباد(آئی پی ایس)چیئرمین گوادر پورٹ اتھارٹی نصیر خان کاشانی نے وفاقی وزیر سائنس اینڈ ٹیکنالوجی آغا حسن بلوچ سے وزارت سائنس و ٹیکنالوجی میں ملاقات کی۔ ملاقات میں گوادر میں ترقیاتی منصوبوں سے متعلق امور پر تبادلہ خیال کیا گیا۔ وفاقی وزیر نے ملک کی خوشحالی کے لیے جدید تعلیم اور ہنر کی ترقی کے ذریعے علاقے کے نوجوانوں کی صلاحیتوں کو بروئے کار لانے پر زور دیا۔ انہوں نے کہا کہ مقامی لوگوں اور ماہی گیروں کو شامل کرنے سے مقامی کمیونٹی میں اونر شپ کا احساس پیدا ہوگا۔ وزیر سائنس و ٹیکنالوجی نے موجودہ حکومت کے ملک میں پسماندہ لوگوں کے معیار زندگی کو بلند کرنے کے عزم کا اظہار کیا. انہوں نے کہا خاص طور پر بلوچستان کے لوگوں کی تعلیمی اور معاشی ترقی پر توجہ دی جائے گی۔ انہوں نے مزید کہا کہ سردار اختر جان مینگل اور بلوچستان نیشنل پارٹی کی اولین ترجیح اور وژن ہے کہ صوبے کی سماجی و اقتصادی حیثیت کو بلند کیا جائے۔ وفاقی وزیر نے کہا کہ چین پاکستان اقتصادی راہداری کے کمپلیکس اور گوادر بندرگاہ کی ترقی سے روزگار کے مواقع پیدا کرنے کے ساتھ ساتھ صوبہ بلوچستان میں خوشحالی آئے گی۔ اور اس میں خطے کی اقتصادی ترقی اور ترقی کے وسیع امکانات ہیں۔وفاقی وزیر براے سائنس اینڈ ٹیکنالوجی آغا حسن بلوچ نے خطے کی اس اہم بندرگاہ کی ترقی کے لیے گوادر پورٹ اتھارٹی کی کوششوں کو سراہا۔ نصیر خان کاشانی نے وفاقی وزیر برائے سائنس و ٹیکنالوجی کو گوادر پورٹ کے تمام جاری آپریشنز اور منصوبوں کے بارے میں بریفنگ دی۔ انہوں نے وفاقی وزیر کو بتایا کہ ان منصوبوں سے ہم بلوچستان کے باصلاحیت نوجوانوں کے لیے مختلف مواقع فراہم کرنے پر کام کر رہے ہیں تاکہ ان مواقع سے بھرپور استفادہ کیا جا سکے۔ انہوں نے مزید کہا کہ گوادر پورٹ اتھارٹی کے تحت اسٹیٹ آف دی آرٹ ووکیشنل اینڈ ٹریننگ انسٹی ٹیوٹ کام کر رہا ہے تاکہ مقامی نوجوانوں کے لیے روزگار کے مواقع مہیا کر کے بااختیار بنایا جا سکے۔ چیئرمین گوادر پورٹ اتھارٹی نے وفاقی وزیر کو گوادر کے تفصیلی دورے کی دعوت دی اور گوادر کی اقتصادی ترقی اور پیش رفت کے لیے تعاون کو سراہا۔
