اسلام آباد،زرعی تبدیلی کے منصوبے پر قومی رابطہ کمیٹی (این سی سی) کے کنوینر ڈاکٹر عابد قیوم سلہری نے قومی زرعی تحقیقاتی مرکز (این اے آر سی ) اسلام آباد کے مختلف شعبوں کا دورہ کیا۔ چیئرمین پی اے آر سی ڈاکٹر غلام محمد علی نے پاکستان زرعی تحقیقاتی کونسل کی ریسرچ فائنڈنگ اور پر اثرات زرعی پیداواری صلاحیت کے بارے میں جامع بریفنگ دی۔
انہوں نے پی اے آر سی کی تیار کردہ ٹیکنالوجیز پر بھی روشنی ڈالی۔ چیئرمین غلام محمد علی نے نغاب میں نیکسٹ جنریشن سیکوینسنگ لیب کے بارے میں بتایا۔ میٹنگ میں پی اے آر سی کے سینئر مینجمنٹ اور سائنسدانوں نے شرکت کی اور زراعت کے آر اینڈ ڈی پر ڈاکٹر سلہری کے مختلف سوالات کے جوابات دیئے۔ مہمان نے پی اے آر سی کی طرف سے چاول اور کیلے کی تیار کردہ حالیہ اقسام میں گہری دلچسپی لی اور بتایا کہ کس طرح ان اقسام کو آخری صارف اور کسان تک تیزی سے پھیلایا جاتا ہے۔ ڈاکٹر عابد قیوم نے پی اے آر سی کی سینئر انتظامیہ کو زرعی تحقیق و ترقی کے بارے میں حکومتی ترجیحات سے آگاہ کیا اور زرعی تبدیلی کے منصوبے کی مختلف سفارشات پر روشنی ڈالی۔ انہوں نے پی اے آر سی پر بھی زور دیا کہ وہ قومی سطح پر اپنی تحقیقی نتائج کو بڑے پیمانے پر اجاگر کرے۔ انہوں نے این اے آر سی میں ایروپونک آلو کے بیج کی پیداوار کی سہولت کا دورہ کیا جہاں کورین اور پاکستانی سائنسدانوں نے ٹیکنالوجی کی وضاحت کی۔ ڈاکٹر عابد قیوم سلہری نے جینز بینک،قومی زرعی تحقیقاتی مرکزاور لائیو سٹاک ریسرچ سٹیشن میں بائیو ریسورس کنزرویشن کی سہولت کا بھی دورہ کیا جہاں انہیں مویشیوں کی نسل کی بہتری، ماہی پروری اور انگورا ربیٹری میں نئی ٹیکنالوجیز کے بارے میں بریفنگ دی گئی۔ انہوں نے پی اے آر سی کے سائنسدانوں کی طرف سے جانوروں کی تولید اور فصلوں میں جینوم پر مبنی افزائش کے کام کو سراہا۔
