گلگت بلتستان میں انٹرنیٹ سروس بہتر بنانے کی کوشش کررہے ہیں،خالد خورشید

گلگت (آئی پی ایس ) وزیر اعلیٰ گلگت  بلتستان خالد خورشید نے صدر مملکت ڈاکٹر عارف علوی کے زیر صدارت گلگت  بلتستان اور آزاد کشمیر میں انٹرنیٹ سروس کی بہتری کے حوالے سے منعقدہ اجلاس میں ویڈیو لنک کے ذریعے شرکت کی۔ اجلاس میں وفاقی وزیر انفارمیشن ٹیکنالوجی امین الحق، پی ٹی اے اور ایس سی او کے اعلیٰ آفیسران بھی شریک تھے۔ اس موقع پر وزیر اعلیٰ گلگت  بلتستان خالد خورشید نے گفتگو کرتے ہوئے کہا کہ وزیر اعظم پاکستان عمران خان کے ویژن کے مطابق گلگت  بلتستان میں انٹرنیٹ سروس کی بہتری کیلئے 3جی اور 4 جی کی نیلامی کو ممکن بنایا گیا۔ گلگت  بلتستان میں گورننس کی بہتری کیلئے انٹرنیٹ کی سہولت لازمی ہے۔ گلگت  بلتستان میں انٹرنیٹ کنکٹیوٹی کو بہتر بنانے اور دور دراز علاقوں میں انٹرنیٹ کی دستیابی کیلئے یونیورسل سپورٹس فنڈ کوجلد از جلد گلگت  بلتستان تک وسعت دی جائے۔ گلگت  بلتستان میں آئی ایس پیز کے نہ ہونے کی وجہ سے بھی انٹرنیٹ کے حوالے سے مشکلات درپیش ہیں لہٰذا آئی ایس پیزکو بھی گلگت  بلتستان میں کام کرنے کیلئے راغب کرنے کی ضرورت ہے۔ وزیر اعلیٰ گلگت  بلتستان خالد خورشید نے کہا کہ گلگت  بلتستان اور آزاد کشمیر کیلئے سپکٹرم کی نیلامی کے دوران جن پرائیویٹ کمپنیوں نے حصہ لیا پی ٹی اے ان پرائیویٹ کمپنیوں کو گلگت  بلتستان میں انٹرنیٹ سروس شروع کرنے کا پابند بنائے۔ گلگت  بلتستان میں ایس سی او کی انٹرنیٹ اور ٹیلی فون سروسز کے حوالے سے نمایاں خدمات ہیں۔ صدر مملکت ڈاکٹر عارف علوی نے اجلاس کے موقع پر گفتگو کرتے ہوئے کہا کہ گلگت  بلتستان اور آزاد کشمیر میں انٹرنیٹ سہولت کی بہتری اور دستیابی حکومت کی ترجیح رہی ہے۔ تعلیم، سیاحت اور معاشی حوالے سے بھی انٹرنیٹ جدید دور میں اہمیت کا حامل ہے۔ ہماری ترجیح ہے کہ گلگت  بلتستان کے دور دراز علاقوں میں انٹرنیٹ کی بہتر سہولیات عوام کو میسر ہوں۔