عمران نیازی سب سے بڑا مافیا، بھاگنے نہیں دیں گے،حمزہ شہباز

پنجاب اسمبلی میں اپوزیشن لیڈر اور (ن)لیگ کے رہنما حمزہ شہباز نے کہا ہے کہ عمران نیازی اس ملک کا سب سے بڑا مافیا ہے ہم انہیں بھاگنے نہیں دیں گے اور اب احتساب ہوگا، اپنا کام کرتے نہیں اور تختیاں لگاتے ہیں، شرم نہیں آتی، پوچھ لینا تھا کہ گرین لائن منصوبہ کس کا ہے، گرین لائن کا افتتاح کرتے ہوئے انہیں شرم نہیں آتی، لاہور میں میڈیا سے گفتگو کرتے ہوئے حمزہ شہباز نے حکومت پر تنقید کرتے ہوئے کہا کہ ہم چار سال سے آپ کے انتقام کا نشانہ بنے ہوئے ہیں، آپ نے عوام کو کبھی ایک کروڑ نوکریوں اور کبھی 50لاکھ گھر کا جھانسہ دیا مگر اب پاکستان کے عوام نے عمران نیاز ی کے خلاف چالان کاٹ دیا ہے ،حکومت کے خلاف جھوٹ، مہنگائی اوربیڈ گورننس کا چالان کٹ چکا ہے، اب عمران خان کو بھاگنے نہیں دیں گے،انہوں نے کہا کہ ظالم حکومت سے جان چھڑانے کیلئے سڑکوں اور پارلیمنٹ میں تمام جماعتوں کے ساتھ جدوجہد کریں گے، ہم نے تمام سیاسی جماعتوں کیساتھ بات کی ہے اور پی ڈی ایم بھی اپنا لائحہ عمل طے کر رہی ہے،حمزہ شہباز نے وزیراعظم عمران خان کو آڑے ہاتھوں لیتے ہوئے کہا کہ تمہارے نورتن آکر عوام کے زخموں پر نمک چھڑکتے ہیں، عوام کو پہرہ دینا ہے کہ کابینہ میں بیٹھے نورتن بھاگنے نہ پائیں،انہوں نے کہا کہ عمران نیازی اس ملک کا سب سے بڑا مافیا ہے، نیازی صاحب ہوش کے ناخن لو، اپنا گھر چند لاکھ میں ریگولرکرالیا اور غریبوں کے لاکھوں گھر گرادیے، تم نے نئے پاکستان کے چکر میں پرانا پاکستان بھی بربادکردیا،حمزہ شہباز نے کہا کہ فارن فنڈنگ کیس کھلے گا تو عمران نیازی کو منہ چھپانیکی جگہ نہیں ملے گی، آپ کو بھاگنے نہیں دیں گے، اب احتساب ہوگا، آپ آٹا، چینی اسکینڈل میں اربوں روپے کی خورد برد کر رہے ہیں،ان کا کہنا تھا کہ اپنا کام کرتے نہیں اور تختیاں لگاتے ہیں، شرم نہیں آتی، پوچھ لینا تھا کہ گرین لائن منصوبہ کس کا ہے، گرین لائن کا افتتاح کرتے ہوئے انہیں شرم نہیں آتی۔