ریاض،سعودی ڈویلپمنٹ فنڈ نے حکومت پاکستان کے ساتھ غیر ملکی کرنسی کے ذخائر اور پٹرولیم مصنوعات کی تجارت کے حوالے سے دو معاہدوں پر دستخط کیے ہیں ۔
پاکستان میں معاشی نمو کو سپورٹ کرنے کے حوالے سے سعودی ڈویلپمنٹ فنڈ کے بورڈ آف ڈائریکٹرز کے چیئرمین احمد بن عقیل الخطیب کی جانب سے فنڈ کے سی ای او سلطان بن عبد الرحمن المرشد نے پاکستان کے ساتھ 4.2 بلین ڈالر کے دو اقتصادی معاہدوں پر دستخط کیے۔پہلے معاہدے میں مملکت کی طرف سے پاکستان کے مرکزی بینک میں غیر ملکی کرنسی کے ذخائر کی مدد کے لیے 3 ارب ڈالر ڈیپازٹ شامل ہے تاکہ کورونا وبا سے پیدا ہونے والی معاشی مشکلات میں مدد ملے، اس معاہدے پر اسٹیٹ بنک پاکستان کے گورنر رضا باقر اور فنڈ کے سی ای او نے کراچی میں قونصل جنرل بندر بن فہد الدایل کی موجودگی میں دستخط کیے۔دوسرا معاہدہ 1.2 بلین ڈالر کا ہوا جوکہ پٹرولیم مصنوعات کی تجارت کیلئے مختص ہے، اس معاہدے پر پاکستان کے وزیر برائے اقتصادی امور عمر ایوب خان نے اسلام آباد میں وزارت تجارت کے ہیڈ کوارٹر میں فنڈ کے سی ای او اور پاکستان میں خادم حرمین شریفین کے سفیر نواف بن سعید المالکی کی موجودگی میں دستخط کیے۔اس مناسبت سے سعودی ڈویلپمنٹ فنڈ کے سی ای او نے کہاہے کہ آج ہم یہ دو معاہدے پاکستانی وزارت تجارت اور مرکزی بینک کے ساتھ دستخط کر رہے ہیں، اس فراخدلانہ حکم پر جو خادم حرمین شریفین شاہ سلمان بن عبد العزیز، اور ان کے ولی عہد عالی مقام، شہزادہ محمد بن سلمان نے دیا ہے تاکہ پاکستان کے غیر ملکی کرنسی کے ذخائر کو بہتر بنایا جاسکے اور پٹرولیم مصنوعات کی تجارت میں مدد مل سکے تاکہ پاکستان کو معاشی ترقی حاصل ہو اور کورونا وبا سے پیدا ہونے والی مشکلات میں مدد ملے”۔انہوں نے مزید کہا یہ دونوں معاہدے اس امداد کی ایک کڑی ہے جو مملکت سعودی عرب سعودی ڈویلپمنٹ فنڈ کے ذریعے جمہوریہ پاکستان کو پیش کرتی رہی ہے، سعودی ڈویلپمنٹ فنڈ نے اپنے قیام کے بعد سے 333 ملین ڈالر سے زائد رقم کے تین گرانٹس فراہم کیے، تاکہ تعلیم صحت اور بنیادی ڈھانچے کے (23) پروجیکٹس کو انجام دینے میں مدد ملے، اس کے علاوہ (20) ترقیاتی قرضے تقریبا (1) بلین ڈالر کے فراہم کیے، تاکہ توانائی، پانی، ٹرانسپورٹ اور بنیادی ڈھانچے کے شعبوں میں مدد ملے، اس کے علاوہ ماضی میں سعودی ڈویلپمنٹ فنڈ نے سعودی ایکسپورٹ پروگرام کے ذریعے (12) مالیاتی آپریشن پیش کیے جس نے مجموعی طور پر 4.7 بلین ڈالر کی ایکسپورٹ کی ضمانت دی، جوکہ پائیدار ترقی کے اہداف کے حصول کے لیے مددگار ہوتا ہے، تاکہ پاکستانی عوام معاشرتی اور معاشی ترقی حاصل کرے اور خوشحال زندگی گزارے۔ پاکستانی وزیر برائے معاشی امورعمر ایوب خان نے سعودی ڈویلپمنٹ فنڈ کی طرف سے پیش کردہ سپورٹ پر حکومت اور پاکستانی عوام کی طرف سے خادم حرمین شریفین اور عالی مقام ولی عہد ،سعودی حکومت اور عوام کا شکریہ ادا کیا، انہوں نے اس بات کی وضاحت بھی کی کہ یہ سپورٹ پاکستان کی معیشت کو بہتر بنانے میں مدد فراہم کرے گی اور اس پریشر کو کم کرے گی جس کا سامنا پاکستانی کرنسی کو ہے، اس کے علاوہ ایکسپورٹ کو بہتر بنانے میں بھی مدد ملے گی۔انہوں نے مزید کہا کہ پاکستان، مملکت کی طرف سے ہر مشکل گھڑی میں سچائی کے ساتھ کھڑے رہنے کو قدر کی نگاہ سے دیکھتا ہے، یہ سپورٹ بھی مملکت کی طرف سے اس وقت آئی جبکہ پاکستان کو شدید اقتصادی بحران کا سامنا ہے۔یہ بات قابل ذکر ہے کہ مملکت کی طرف سے پاکستانی معیشت کے لیے مسلسل سپورٹ کے نتیجے میں پاکستان نے G-20 کے ذریعے مملکت نے جو قرضوں کی موخر ادائیگی کا پروگرام پیش کیا اس سے پاکستان کو فائدہ پہنچا، جس کے نتیجے میں پاکستان کے قرضے موخر کیے گئے جن کی مالیت 3 بلین ریال سے زیادہ تھی، اس علاوہ فنڈ کی طرف سے وہ ترقیاتی قرضے بھی موخر کیے گئے جن کی مالیت تقریبا 152 ملین ریال ہے۔
