خادم الحرمین الشریفین شاہ سلمان بن عبدالعزیز آل سعود نے باران رحمت کے حصول کے لیے جمعرات 29 ربیع الاول 1443ہجری کو ملک بھر میں نماز استستقا کی ادائی کی تاکید کی ہے جس کے بعد مسجد الحرام اور مسجد النبوی سمیت سعودی عرب کی تمام مساجد میں صلا استسقا (بارش کے لیے خصوصی نماز)ادا کی گئی۔غیرملکی میڈیا کے مطابق شاہی دیوان کی طرف سے جاری ایک بیان میں کہا گیا ہے کہ خادم الحرمین الشریفین شاہ سلمان بن عبدالعزیز کی طرف سے تاکید کی گئی ہے کہ ملک بھر میں جمعرات کے روز نماز استستقا کا اہتمام کرتے ہوئے سنت رسول صلی اللہ علیہ وسلم کو تازہ کیا جائے اور اللہ سے باران رحمت کے لیے دعائیں کی جائیں۔شاہی دیوان میں کہا گیا ہے کہ توبہ واستغفار ،ذکر اذکار،صدقات وخیرات، نوافل کا اہتمام، رجوع اللہ اور زیادہ سے زیادہ عبادت کی جائے تاکہ اللہ کی رحمت کے نزول کے دروازے کھل سکیں۔
