جاپان کی جانب سے گروہی تصادم کو ہوا دینے کی کوششوں کو عوامی حمایت نہیں ملے گی، چینی وزارتِ دفاع

بیجنگ :اطلاعات کے مطابق، امریکہ اور جاپان نے حال ہی میں ” کین سورڈ 27 کے نام سے مشترکہ فوجی مشقیں کی ہیں۔ 29 اکتوبر کو چین کی وزارتِ دفاع کی معمول کی پریس کانفرنس کے دوران ترجمان سینئر کرنل ژانگ شیاؤگانگ نے صحافیوں کے سوالات کے جواب میں کہا کہ جاپان کی جانب سے گروہی تصادم کو ہوا دینے کی کوششوں کو عوامی حمایت حاصل نہیں ہوگی۔ انہوں نے کہا کہ جاپان ایک بار پھر عسکریت پسندی کی راہ پر تیزی سے آگے بڑھ رہا ہے اور خطے کی سلامتی کے لیے حقیقی خطرہ بنتا جا رہا ہے۔
ایک اوراطلاع کے مطابق، جاپان کے وزیر دفاع نے دعویٰ کیا ہے کہ چین اور روس کی مشترکہ فضائی گشت "جاپان کے خلاف طاقت کا مظاہرہ” ہے۔ ترجمان نے جاپانی وزیرِ دفاع کے اس دعوے پر ردعمل دیتے ہوئے کہا کہ جاپان کا یہ مؤقف خطے میں سلامتی کے خطرے کو بڑھا چڑھا کر پیش کرنے کا ایک اور روایتی حربہ ہے۔ یہ بیان چین اور روس کی جائز سرگرمیوں کی مسلسل نگرانی اور ان میں مداخلت کے لیے جاپان کے خطرناک اقدامات کو ظاہر کرتا ہے۔ انہوں نے مزید کہا کہ اس بیان سے یہ بھی ظاہر ہوتا ہے کہ جاپان خود ساختہ خوف اور بدگمانیوں کا شکار ہے۔