بیجنگ :ابھی حال ہی میں گزشتہ ماہ ستمبر کے دوران چائنا انٹرنیشنل فیئر فار انویسٹمنٹ اینڈ ٹریڈ، چائنا انٹرنیشنل فیئر فار ٹریڈ اِن سروسز سمیت متعدد نمائشوں نے کئی کثیرالقومی کمپنیوں کے اعلیٰ عہدیداروں کو شرکت کے لیے اپنی جانب متوجہ کیا۔ نمائشیں ختم ہونے کے بعد بعض عہدیداروں نے فوری طور پر اپنے ممالک واپسی کا سفر اختیار کرنے یا سیاحتی مقامات کا رخ کرنے کے بجائے براہِ راست چینی فیکٹریوں کا دورہ کیا۔انہوں نے فیکٹریوں کا معائنہ کیا، تعاون کے امکانات پر بات چیت کی اور جدت طرازی کے نئے مواقع تلاش کیے۔ ان عہدیداروں نے کہا کہ چینی فیکٹریوں کی سائنس و ٹیکنالوجی کی سطح نے ان پر گہرا تاثر چھوڑا ہے۔ چین کاروباری تصورات کو عملی شکل دینے اور بڑے پیمانے پر ان کے اطلاق کے لیے ایک بہترین تجربہ گاہ ہے۔ یہاں کامیاب عملی نمونے تشکیل دینے کے بعد انہیں بیرونِ ملک کی منڈیوں سے باآسانی منسلک کیا جا سکتا ہے۔
