میونخ:اسپین کے سرکاری دورے پر موجود جرمن صدر اشٹائین مائر نے کہا کہ جرمنی 1937 میں اسپین کے قصبے گار نیکا پر بمباری کا ذمہ دار ہے اور جرمن عوام کو تاریخ میں کیے گئے جرائم کو کبھی نہیں بھولنا چاہیئے۔ اسی دن میڈرڈ کے شاہی محل میں اسپین کے بادشاہ فیلپے ششم اور ان کی اہلیہ کی میزبانی میں دیے گئے عشائیے میں جرمن صدر نے کہا کہ یہ بہت ضروری ہے کہ ہم اس وقت ہونے والے تمام واقعات کو کبھی نہ بھولیں۔ میں خاص طور پر یہ بات اپنے جرمن ہم وطنوں سے کر رہا ہوں، یہ جرم جرمنوں نے کیا تھا، اور یہ ہمیں یاد دلاتا ہے کہ چاہے موجودہ دور ہو یا مستقبل، ہمیں اس وعدے پر عمل کرنا ہوگا۔
یاد رہے کہ 26 اپریل 1937 کو، اسپین کی خانہ جنگی کے دوران، نازی جرمنی کی افواج نے بمباری سے اسپین کے قصبے گار نیکا کو نشانہ بنایا، جس سے سینکڑوں افراد ہلاک ہو ئے اور بین الاقوامی برادری میں شدید غصہ پیدا ہوا۔ دوسری جنگ عظیم کے بعد، جرمنی کے تمام طبقات نے جنگ کے جرائم پر مسلسل غور کیا۔ 7 دسمبر 1970 کو، اس وقت کے وفاقی جرمنی کے وزیر اعظم ویلی برانٹ نے وارسا میں یہودی شہدا کی یادگار پر پھول چڑھاتے وقت دونوں گھٹنے زمین پر رکھے۔ان کے گھٹنے ٹیکنے کو جنگی جرائم پر جرمنی کا ا عتراف سمجھا گیا، اور اس نے جرمنی و پولینڈ سمیت دیگر ممالک کے درمیان بعد از جنگ مفاہمت کو فروغ دیا۔
